BOSCO CARIDE

O estilo ou tendencia plástica comunmente denominada hiperrealismo atopou moi diversas formas de manifestarse, dende o que non pretende apartarse nin un chisco do aparentemente documental, ata aquel que discorre por evocacións de dinastía lírica. E a esta pertence a obra de Bosco Caride, vigués nacido en 1963. 

Licenciado en Belas Artes pola Universidade de Salamanca, conseguiu bolsa de estudos na Bienal de Pontevedra de 1988 e foi premiado no Certame de Cambre ao ano seguinte. Na Bienal de Ourense de 1995, foi premio Prego d 'Oliver e conseguiu outros galardóns en Coveo, Valdepeñas e A Coruña, en cuxo museo Unión Fenosa está representado, así como en coleccións institucionais diversas de Galicia. 

Comezou a expoñer na mostra itinerante Novísimos de 1986 e a súa obra percorreu toda Galicia, León, Murcia, Alacante e algunhas cidades de Portugal. 

O absolutamente común e cotián é a temática da obra pictórica de Bosco Caride, monocroma e de minuciosidade debuxística tal que semella negativos fotográficos resaltados polo pintor. Interiores de almacéns, supermercados, edificios en construción, estacionamentos de vehículos: velaí temas recorrentes, nos que afonda dándonos unha visión como esvaecida e, ao mesmo tempo, exacta, preciosista, porque o seu trazo é caligráfico, primoroso, aínda que sempre vibrante, non meramente mecánico e só hábil. Hai emoción, inquietante emoción, nesta pintura tan aparentemente fría e documental. Un valor positivo, apreciado xa en moitos ámbitos, cun oficio espléndido e unha personalidade calada.