ALMUDENA FERNÁNDEZ FARIÑA

Cursou a carreira de Belas Artes na facultade de Pontevedra, pola que se licenciou, para inicia-lo doutoramento na de Salamanca. Seguiu outros cursos monográficos complementarios e asistiu a talleres importantes, como os que dirixiron Hernández Pijuán en Santander e Rafael Canogar na Coruña, no ano 1995. Foi bolseira do programa Erasmus e obtivo premios en certames diversos de Galicia. Foi seleccionada na IV Mostra Unión Fenosa, 1995. Comezou a amosa-la súa obra en colectivas en 1991, con premio na de Novos Valores de Pontevedra, en 1994 e, en Tui, en 1995. Figura, entre outras coleccións, na do Concello de Tui e na da Fundación Cajamadrid. A pintura de Almudena Fernández Fariña é de concepción abstractiva, aínda que con referencias formais, se ben moi diluídas. O seu paisaxismo é máis conceptual ca referenciado, onirista e sen dúbida con forte carga lírica. Unha paleta quente e sobria ó tempo que lle permite expresarse, con mancha ampla e materia leve, case diluída, en carmíns, sienas, ocres, coma se fosen tinturas que se desfán nun ambiente líquido. O resultado, dentro dunha buscada e conseguida sobriedade, é altamente imaxinativo, de beleza recatada, máis captable. Hai sen dúbida nesta artista un gran temperamento creativo que permite augurar da súa obra un camiño firme.