FAUSTO DE LIMA

De orixe galega, con familia enraizada en Vigo, alternou a pintura co periodismo, que exerceu na capital de España e mais en diversos lugares do mundo, como corresponsal viaxeiro. Instálase en Italia, onde se entrega por completo á pintura especializándose no retrato, que realiza de xeito moi persoal, con grande elegancia e fantasía cromática. Foron modelos seus figuras moi coñecidas da política, a arte e o cine italianos. Realizou numerosas exposicións en Roma e Florencia, cidades nas que reside habitualmente, e mais en Milán, París, ..., así como en Madrid, Barcelona, e Vigo, onde a súa única mostra na década dos setenta chamou poderosamente a atención pola súa fantasía colorista e o seu excelente debuxo. Está representado en diversos museos contemporáneos, así como en importantes coleccións. O museo de Vigo posúe unha obra súa, non excesivamente representativa. A pintura de Fausto de Lima encaixa nun posmodernismo con certas reminiscencias impresionistas. Adoita recorrer a temas propios do expresionismo hispanoamericano, aínda que sempre acuse unha tradición europea de longo coñecemento da pintura francesa e italiana.