MIGUEL SACO

Coñecedor profundo dos materiais da escultura, traballou o barro, a pedra e a madeira. O seu afán innovador lévao a se vencellar cos principais movementos vangardistas que xorden en Galicia. A súa aportación á primeira mostra "Atlántica", na Casa da Cultura de Baiona, supuxo unha chamada de atención pola peculiar concepción dos volumes, a partir dunha rigorosa xeometría plana e curva no espacio. Realizou exposicións en diferentes cidades de Galicia e centro de España. Traballa recluído en Vila de Paderne, na súa provincia natal. Saco é un plástico conceptualista, analítico rigoroso, capaz de acadar composicións suxerentes con elementos de simplificación total, nos que a madeira amosa a súa morfoloxía coma se acabase de saír do serradoiro. Por completo afastado de calquera preciosismo hai nel unha libérrima expresión coma de carpinteiro hábil que sabe que canto ensambla queda trascendido polo sopro da creatividade. Posúen obras súas diversas coleccións institucionais e particulares.