GUILLERMO VARGAS RUIZ
Vargas Ruiz, Guillermo
( Bolullos de la Mitación, Sevilla, 7 de octubre de 1910 - Madrid, 1990 )
Biografía
Longa carreira a deste artista que parte de modos impresionistas. O seu consumado oficio permítelle darlles aos seus cadros un clima poético e intimista. Excelente debuxante, cultivou con fortuna o retrato, cunha mancha solta, de ponderado empaste, en tons ocres.
Realizou exposicións en Sevilla, Madrid, Barcelona, Bilbao e outras cidades de España. Participou nas dúas primeiras Bienais Hispanoamericanas, en Madrid, 1951 e na Habana, 1953. Concorreu ás Exposicións Nacionais de Belas Artes, nas que obtivo a terceira medalla na de 1948 e a segunda na de 1952. Ao ano seguinte, foi accésit no Concurso Nacional de Pintura.
Cultivou con fortuna o gravado, modalidade na que obtivo medalla de ouro do Círculo de Belas Artes de Madrid.
Está representado no Museo Español de Arte Contemporánea de Madrid e noutros moitos de provincias españolas.
Bibliografía
CAMPOY, A. M.: Diccionario crítico del arte español contemporáneo, Ibérico Europea de Edic., Madrid, 1973.
DICCIONARIO de pintores españoles contemporáneos, Edic. Estiarte, Madrid, 1972.
PANTORBA, B. de: Historia y crítica de las Exposiciones Nacionales de Bellas Artes, Madrid, 1980.
