Bodegón

Comentarios

A gran complexidade do mundo interior deste pintor-poeta lévao a reelaborar, nos anos noventa, obras ideadas a mediados da década dos oitenta xestando unha obra aberta, sempre disposta para ser reinterpretada.

Sobre cartón e materiais de refugallo, reciclados, cosidos con cordas e completados con incisións, signos e rupturas, preséntase unha obra vibrante onde a luz é un elemento fundamental, acadada mediante o emprego de vernices que discorren sobre a superficie ondulante dos cartóns e dos traveseiros de madeira que soportan a obra e a conciben como un todo, como un obxecto integral e independente.

A creación, absolutamente matérica e vital, ofrece un resultado final que, aínda que en moitos casos está condicionado polos ácidos empregados no proceso de traballo, na peza as incisións sobre o cartón parecen simular formas de corazón. A elección da madeira e o cartón rizado como elementos de expresión débese, en palabras de Antón Castro, a que son "un material secuencial para dirimir agresións, texturas e iconografías cosidas".

Lamazares é un autor que pode traballar en varias series á vez. Sen dúbida imbuído pola poética da serie na que estaba somerxido neste momento, "Gracias Vagabundas", onde as naturezas aludían ó milagre da vida, recreábanse no antropolóxico inundando todo dun sentimento relixioso, o autor concibe esta peza onde se intúe a austeridade e a sobriedade das naturezas mortas de Zurbarán ou Sánchez Cotón.



EXPOSICIÓNS:

"Lamazares". Setembro-outubro de 2000. Galería de Arte Contemporáneo VGO, Vigo

Exposiciones

"Colección Caixanova. Unha visión da arte contemporánea galega". Centro Torrente Ballester. Ferrol. Do 21 de marzo ao 18 de abril de 2002.  Auditorio de Galicia. Santiago de Compostela.Do 26 de abril ao 28 de xullo de 2002. Pazo da Cultura. Pontevedra. Do 3 de outubro ao 30 de novembro de 2002.