Sello 23
- INV:
- 2677
- Año de creación:
- 1987
- Dimensiones:
- 130 x 176 x 0
- Técnica:
- Técnica mixta sobre cartón-madeira
Comentarios
A humildade do material e o concepto de azar son ingredientes esenciais na obra deste artista que bebe da súa infancia, da súa alma de campo e da forza que habita no seu interior.A serie Sellos, de 1987, é unha mostra da importancia do elemento místico e relixioso na súa poética cunhas claves que van máis aló do material e pictórico. As súas creacións son cousas feitas en madeira, sobre estructuras de portas que serven como soporte, con cartóns, con vernices, con cravos, que conteñen un profundo valor semántico. A porta, como sinala David Barro, facilita o paso, pero tamén o pecha, "porta como casa, como mundo, como patria, metáforas ambiguas que recordan a Marcel Duchamp, que albergan a curiosidade".
O sobre, dun vermello intenso e apaixonado, emociona polo brillo do verniz que funciona como elemento cromático, como mecanismo de atención visual alterado pola presencia do selo. A estampiña, que flota sobre o espacio compositivo modificando a temperatura da cor, turbando a superficie lisa e radiante, describe no seu centro un signo de grande potencia, unha forma nuclear, amarela, que recorda a unha semente disposta para xerminar, desvelando o misterio da carta e anunciando o segredo da vida.
Este universo de cartón, onde motivo e baleiro son principios complementarios, facedores dunha mesma realidade transcendida, fíxase á ancoraxe de madeira mediante fortes cravos que outorgan á proposta unha entidade física e real, profundamente sólida a pesar do etéreo do contido, da fraxilidade da mensaxe.